登山越嶺 毅行者2024完走後感 四方山大霧比爛路更難應對 November 18, 2024 / 毅行者2024結束,筆者與3名隊友花了近兩日在泥濘中完成,由於受打風影響,早已做好打水戰的準備,惟四方山大霧得伸手不見五指比爛路更難。 今次非筆者第一次參加毅行者,首次完成。之前計劃預期要面對很多變數。距離長加上隊制,較個人賽發生問題機率幾何級數上升。首先第一定要多謝隊友。唔係四個隊友一齊完成,唔算真正完成毅行者。然後係所有以任何方式支持過我哋嘅朋友,義工,工作人員。 ▲麥理浩徑第3段的雞公山「塞人」 早已經有打水戰的準備,落雨影響唔大。反而有利降溫。落雨引致爛地是意料之外,克服方法是用近似滑雪嘅技巧落山。塞車時候候同前後左右傾偈,感覺上玩短距離的參加者對路況比較緊張,玩長距離的人似乎都會欣然接受。 ▲在黑暗中於針山落山 路面狀況方面,應對路況是參加者的責任,是能力的考驗。賽會提供支援,而我認為今次賽事支援是足夠。賽事大致上安排完善。我們是比較後慢的參加者,每一個站都有足夠的食水,飲品(雖然食物款式會少啲,但仍然有嘢食)。賽道上路標足夠,我完全沒有發生行錯路的情況。物理治療,中醫推拿,救護站資源非常充足,增加大家完成機會。除了大家談及的路況,我覺得更難應對是大霧。令頭燈功效驟降,視野不清,在四方山曾搵唔到路,有數次曾經去到邊緣路段折返。 ▲今屆毅行者完成率為近年最低。 總結今年毅行者,大會公布完成率係近年新低,四人完成隊伍只係僅高於五成。非常慶幸可以四個人一齊完成。100公里的越野活動,無論本地同海外都越來越多,但係要求四個人一齊先算真正完成,基本上就只有毅行者。